Ol pipol blong Solomon Islands i sapotim laik blong ol long West Papua na i askim strong long gavman blong Solomon Islands i mas sapotim ol.
 |
| Ol United Liberation Movement for West Papua lain long MSG miting (Credit: Audience submitted) |
WANI/Radioaustralia – Chairmeri blong Solomon Islands in Solidarity for West Papua, Lily Chekana nau i mekim dispela toktok taim ol lida blong United Liberation Movement for West Papua i wok long bungim gavman na ol arapela lain long Honiara.
Ms Chekana i tok Solidarity for West Papua muvmen i makim olgeta pipol blong Solomon Islands na gavman imas bihainim laik blong ol.
Em i tok Solidarity muvmen blong ol nau i invaitim ol ULMWP lida ia long go mitim ol na Praim Minista Manasseh Sogavare husat i Chairman blong Melanesian Spearhead Grup.
Ms Chekana i tok Solomon Islands in Solidarity for West Papua i laik long West Papua we i nau gat Observer status long MSG i mas kamap ful memba.
Em i tok muvmen blong ol i laik long West Papua i mas stap long United Nations Decolonisation list long ol imas kisim independens.
Em i tok ol i nau gat wanpela ofis West Papua long Honiara blong wokim ol wok blong sapotim ol West Papua i kisin independens.
Posted by: Sam Seke
Copyright ©RadioAustralia